En Nedgia estamos a substituír os contadores de gas antigos por novos contadores intelixentes, desta forma reafirmamos o compromiso coa innovación e a economía circular.
Que pasa cos contadores de gas antigos?
Os contadores de gas antigos están a substituírse progresivamente polos novos contadores intelixentes. O contador analóxico (por membrana ou ultrasóns) utilizouse dende que se comezou a distribuír gas natural. En moitos casos continúa sendo así e sentímonos orgullosos de chegar a xestionar unha gran rede de puntos de subministración con estes contadores.
A necesidade de ofrecer un mellor servizo e de que o sector gasístico cumpra o regulamento estanos levando a despregar unha nova rede de contadores intelixentes ou “smartmeters”.
Por iso temos previsto un despregamento masivo destes contadores intelixentes entre todos os nosos clientes e que terá os seguintes puntos clave:
- Dirixirase a clientes que consuman menos de 50.000 kWh/ano. Os clientes industriais, empresas e outro tipo de clientes xa utilizan sistemas dixitais ou de telemetría para poder realizar as súas medicións, pero era preciso realizar este cambio tamén no mercado de clientes particulares ou ‘residenciais’, é dicir, todas aquelas persoas que residen nunha casa ou un piso, ou pequenos negocios que realicen o seu labor dende un pequeno local integrado nun edificio.
- O despregamento dos novos contadores está previsto que se realice nun prazo de 6 a 8 anos e que comece en setembro de 2026.
- Nedgia realizará a retirada do contador antigo e a instalación do novo no seu lugar, sen ningún custo, mediante un sistema en réxime de alugueiro de acordo coa regulamentación vixente, do cal informaremos por diversos medios a todos os nosos clientes.
Como é o proceso para reciclar un contador de gas antigo?
Para retirar os contadores antigos, definimos unha serie de fases que se irán implementando nos diferentes clientes para que sexa un proceso sostible e responsable co medio ambiente.
Paso 1: planificación e loxística
A planificación da retirada resolverase en distintas fases: comezarase por un número pequeno de clientes para poder ir realizando as probas, e posteriormente se implantarán a ámbito nacional a través dos diferentes instaladores. Atendendo á loxística, os pasos para realizar a substitución dun contador no seu proceso de retirada son os seguintes:
- Desmontaxe: separación de carcasa, mecanismos, contador numérico e compoñentes electrónicos.
- Clasificación:
- Metais: aceiro, aluminio e cobre → envíanse a fundición e reutilización.
- Plásticos: separados por tipo → envíanse para a súa reciclaxe.
- Electrónica: sensores e placas → trátanse como residuos de aparellos eléctricos e electrónicos.
- Baterías → reciclaxe especializada de baterías.
- Descontaminación: limpeza dos residuos de gas ou aceites.
Paso 2: normativa e seguridade
Con respecto á normativa referente á seguridade, que é unha preocupación global polo envío de datos a través de determinadas plataformas dixitais, dende Nedgia garantiremos que os únicos datos que se transmitirán á nosa rede serán os dos contadores. Polo tanto, non se verá involucrado ningún dato persoal. Ademais, a cifraxe dos datos garantirá a seguridade destes.
Unha vez instalados os contadores, procédese a conectalos a través dun estándar coñecido como Nbiot, que permite conectar sen fíos os dispositivos que se instalaron a través de redes móbiles.
Que materiais valiosos se recuperan dun contador?
Os materiais que se poden recuperar coa reciclaxe serían os metais, plásticos, vidro e compoñentes electrónicos:
- Metais: o aluminio, o cobre e o aceiro son metais comúns en contadores e son reciclables.
- Plásticos: os contadores teñen carcasas plásticas e outro tipo de plásticos que poden reciclarse.
- Vidro: algúns contadores poden conter vidro nas súas pantallas ou elementos ópticos.
- Compoñentes electrónicos: circuítos, cables e outros compoñentes electrónicos poden recuperarse e reciclarse, aínda que adoitan requirir procesos específicos para separar os diferentes materiais.
Revalorización de plásticos
A revalorización de plásticos é o proceso de transformación dos residuos plásticos noutros produtos ou materiais útiles, que van alén da simple reciclaxe. Implica a recuperación da materia prima para darlle unha segunda vida útil, deste xeito, redúcese a dependencia de recursos virxes e minimízase o impacto ambiental dos residuos plásticos.
Reciclaxe de compoñentes electrónicos (RAEE)
A reciclaxe de compoñentes electrónicos realízase segundo o Real decreto 110/2015, do 20 de febreiro para os «residuos de aparellos eléctricos e electrónicos» ou «RAEE», que son todos os aparellos eléctricos e electrónicos que pasan a ser residuos de acordo coa definición que consta no artigo 3.a) da Lei 22/2011, do 28 de xullo. Esta definición abrangue todos aqueles compoñentes, subconxuntos e consumibles que fan parte do produto no momento en que se refugan e como deben xestionarse.
Os RAEE ou refugallos electrónicos adoitan contar con substancias perigosas, como cadmio, mercurio, chumbo, arsénico, fósforo, aceites perigosos e gases que destrúen a capa de ozono ou afectan o quecemento global, como os clorofluorocarbonos (CFC), hidroclorofluorocarbonos (HCFC), hidrofluorocarbonos (HFC), hidrocarburos (HC) ou amoníaco (NH3). Estes son necesarios para garantir que funcionen, pero poden emitirse ao medio ambiente e mesmo ser prexudiciais para a saúde humana se, unha vez que se converten en residuos, os aparellos non se xestionan e se tratan axeitadamente.
Garantía e rastrexabilidade do proceso
Para poder realizar a rastrexabilidade do proceso contamos con sistemas concretos de xestión documental.
Identificación ambiental (NIMA)
Todos os almacéns están dados de alta cun NIMA (número de identificación ambiental), que asegura unha xestión legal e rastrexable, e estes almacéns son os encargados de poder realizar a xestión dos residuos posteriormente.
Control documental e xestores autorizados
Contamos con xestores de residuos asignados por zona xeográfica: Afesa (zona norte e leste) e Gamara (zona centro e sur). Estes xestores encárganse da xestión documental e a dos residuos. En calquera caso, todos os nosos provedores sométense á normativa vixente no aspecto referente á reciclaxe de residuos.
A economía circular en acción
Os contadores intelixentes ofrecen numerosas vantaxes con respecto ás iniciativas sostibles e respectuosas co medio ambiente.
Ecodeseño para a desmontaxe
Os novos contadores intelixentes xa dispoñen dun deseño adaptado á súa posterior reciclaxe, o cal permite que, en caso de reposición ou introdución de novos contadores, se poidan reciclar de forma sinxela as diferentes partes deste.
Reintrodución de materiais
A reintrodución de materiais consiste na utilización e reciclaxe de determinados materiais que se refugaron para utilizalos con posterioridade. Neste sentido, como xa detallamos, reutilízanse determinados materiais e outros, como os plásticos, recíclanse para poder utilizarse de novo.
Cal é o impacto ambiental positivo de cambiar os contadores?
Os novos contadores intelixentes serven para reforzar o noso compromiso co medio ambiente, xa que nos permite realizar un impacto positivo sobre este ao reducir de forma drástica as emisións de CO2 provocadas fundamentalmente polos desprazamentos realizados para a súa lectura.
Redución da pegada ambiental
O uso de contadores intelixentes permite reducir en gran medida a pegada ambiental, isto débese a que as lecturas de contadores en remoto reducen os desprazamentos. En Nedgia, calculamos que, coa introdución dos novos contadores intelixentes, poderemos reducir ata 476 toneladas de emisións de CO2, ao cabo dos 8 anos de implantación progresiva dos contadores intelixentes.
Cumprimento normativo
Nedgia, de acordo coa súa política de Responsabilidade Social Corporativa, valora sempre positivamente as accións emprendidas polos seus provedores no sentido dun maior respecto polo medio ambiente, entre as cales están as seguintes:
- Os nosos provedores sempre presentan certificacións ambientais que garanten prácticas respectuosas coa contorna.
- Os produtos subministrados estarán fabricados, preferentemente, con tecnoloxías respectuosas co medio ambiente e con materiais e elementos que permitan a súa reutilización ou reciclaxe ao final do ciclo de vida do produto. Os provedores deberán garantir o uso de materiais sostibles ou de baixo impacto ambiental na produción dos dispositivos obxecto desta especificación, así como a súa vida útil e durabilidade, coa finalidade de minimizar o impacto de xeración de residuos.
- Sempre se detallarán as distintas partes valorizables do equipo e o seu tratamento teórico. En canto aos non valorizables, tamén deben declaralas, así como o seu tratamento teórico.
- As embalaxes serán de material reciclado ou de reciclaxe doada ou reutilizable e, ademais, o seu deseño minimizará a cantidade de material empregado.
- Os provedores deben presentar evidencias de cumprimento coas regulacións tanto nacionais como internacionais en materia de medio ambiente.
Máis sobre sostibilidade en Nedgia
As políticas de sostibilidade en Nedgia véñense implementando dende moito antes do lanzamento destes novos contadores intelixentes. De feito, estamos aliñados cos obxectivos de desenvolvemento sostible. Ademais, estamos incluídos no OGMP 2.0: a iniciativa insignia do Programa das Nacións Unidas para o Medio Ambiente para a mitigación das emisións de petróleo e gas.
Que outras iniciativas de sostibilidade ten Nedgia?
A folla de ruta de Nedgia para contribuír á sostibilidade inclúe un plan de sostibilidade que estableceu obxectivos no ámbito ambiental (E), social (S) e de gobernanza (G). Grazas a el, preténdese mellorar a xestión e o desempeño da compañía en relación con aqueles obxectivos de desenvolvemento sostible (ODS) nos que se identificou unha maior posibilidade de contribución.
Para consultar estes obxectivos, podes acceder á nosa páxina web.
