A coincineración é a queima conxunta de residuos e combustibles fósiles para poder obter enerxía a partir da calor xerada. Trataríase, polo tanto, dunha fonte de enerxía que se pode aproveitar posteriormente como enerxía térmica ou eléctrica.
Que é a coincineración? Vantaxes e inconvenientes
A coincineración comeza co tratamento dos residuos mediante diferentes medios. Unha vez tratados, pódense utilizar como combustible xunto con outros combustibles tradicionais para poder xerar calor e desta forma obter enerxía.
As principais vantaxes desta forma de obter enerxía serían:
- Reducir a dependencia dos combustibles tradicionais, ao incluír os residuos como parte do proceso de obtención de enerxía.
- Reducir os residuos do medio ambiente, dando unha segunda vida a determinados residuos que poden ser aproveitados como enerxía.
- Aproveitar posteriormente e no posible as partículas que se obteñen despois da coincineración, que se poden destinar a labores agrícolas ou de reforestación.
- Conectar e transformar as plantas xeradoras de enerxía que se atopan xa en uso, aínda que isto supón aplicar novas normativas reguladoras.
As desvantaxes tamén fan parte desta forma de xeración de enerxía:
- Contaminación asociada. Aínda que se avanzou moito nas tecnoloxías que permiten depurar os gases, a contaminación xerada polo uso dos combustibles tradicionais en combinación coa emisión de partículas existe.
- O cheiro dos residuos que están almacenados xunto co po xerado posteriormente, que tamén xera malos cheiros ao almacenarse de novo en forma de cinza.
- Medidas de seguridade: Resultan cruciais as medidas de seguridade neste tipo de proceso, por iso aparecen reguladas en varios decretos lei tanto a coincineración como a posterior xestión das cinzas e as escouras que se xeran, co conseguinte custo tanto en medidas de prevención como de almacenamento.
- Desincentivación da reciclaxe: Algúns expertos consideran que pode existir un maior interese na xestión posterior dos residuos que na reciclaxe previa.
Principais diferenzas coa incineración
Conforme o Regulamento de emisións industriais que se aprobou mediante o Real decreto 815/2013, unha instalación de incineración é: “calquera unidade técnica ou equipo, fixo ou móbil, dedicado ao tratamento térmico de residuos, con ou sen recuperación da calor producida pola combustión, mediante a incineración por oxidación de residuos, así como outros procesos de tratamento térmico, se as substancias resultantes do tratamento se incineran a continuación, tales como pirólise, gasificación e proceso de plasma”. Por outra banda, indícase que unha instalación de coincineración é “toda instalación fixa ou móbil cuxa finalidade principal sexa xerar enerxía ou fabricar produtos materiais e que, ou ben utilice residuos como combustible habitual ou complementario, ou ben os residuos reciban nela tratamento térmico para a súa eliminación mediante a incineración por oxidación dos residuos, así como por outros procesos de tratamento térmico, se as substancias resultantes do tratamento se incineran a continuación, tales como pirólise, gasificación e proceso de plasma”.
Así que, segundo a normativa vixente, a diferenza fundamental entre ambos os procesos consiste en que na coincineración aproveitamos a enerxía térmica. Isto ten tres vantaxes fundamentais fronte á incineración, que serían:
- A capacidade de controlar con moita maior precisión a temperatura.
- Reducir as emisións contaminantes.
- Reducir os custos asociados á posta en marcha, ao aproveitarse de xeito habitual as plantas de xeración de enerxía existentes para introducir os residuos como fonte de enerxía.
Que impacto ambiental ten a coincineración?
As partículas que se emiten á atmosfera nos procesos de combustión das coincineradoras son todo un reto para os seus propietarios. Actualmente, xa existen sistemas que controlan a contaminación, coñecidos como PCS, que melloran de xeito considerable a calidade do aire que se emite ao exterior.
O principal problema existente é a emisión de determinados gases que contaminan a atmosfera: dioxinas, furanos e outras partículas en suspensión. Tamén pola xeración de residuos sólidos, como as escouras e as cinzas, que son residuos cualificados como perigosos e que deben tratarse con coidado para que non contaminen os acuíferos das augas a nivel subterráneo e, con iso, o solo.
Porén, grazas aos avances realizados en materia de filtración do aire e na mellora do almacenamento dos residuos xerados a posteriori, conseguiuse mellorar moito.
Coincineración fronte ao gas natural
Malia que a coincineración é un dos elementos clave no proceso de economía circular que se está xestando a ámbito mundial, cremos que, para producir enerxía térmica, xa contamos con alternativas como o gas natural ou o biometano, que demostraron historicamente ser moito máis ecolóxicas, sostibles e realistas á hora de ser distribuídas como fonte de enerxía.
Polo tanto, consideramos que, como fonte de enerxía, tanto o gas natural como o gas renovable, coñecido como biometano, e o hidróxeno, ofrecen no futuro moitas vantaxes con respecto á coincineración:
- O gas natural ou o biometano distribuído é menos contaminante. As plantas de coincineración utilizan numerosas materias contaminantes para xerar a enerxía a partir de múltiples residuos (follaxe, madeira etc.), o que produce moita contaminación ao seu redor malia as medidas de redución.
- Agora, ademais, contamos con gases renovables, como o hidróxeno ou o biometano, que nos permiten ser neutrais nas nosas emisións de CO2 e contribuír a reducir o efecto invernadoiro cada vez que se utilizan.
- O gas natural ou o biometano chega ás casas e empresas usando a rede de gas creada previamente e sen necesidade de cambiar ningunha instalación. As centrais de incineración aínda están no proceso de distribución para chegar dende as aforas ás cidades e as vilas.
- O gas natural ou o biometano é máis barato que a enerxía proporcionada polas centrais de coincineración.
En Nedgia confiamos claramente nas enerxías renovables e, neste sentido, vemos imprescindible apostar polo biometano como alternativa a outras formas de enerxía, como a coincineración, e contamos, ademais, cunha infraestrutura preparada para poder distribuír as novas enerxías menos contaminantes como o gas natural renovable e o hidróxeno.
