Nedgia organizou na Coruña unha xornada de traballo xunto a Floene, a principal distribuidora de gas de Portugal, co obxectivo de intercambiar coñecementos e compartir boas prácticas sobre o futuro da distribución de gas e o desenvolvemento do gas verde.
Esta iniciativa forma parte da colaboración que ambas as compañías manteñen para avanzar en solucións enerxéticas máis sostibles e eficientes. A través de diferentes encontros, os equipos de Nedgia e Floene traballan conxuntamente para analizar os retos e oportunidades que afronta o sector enerxético, con especial atención ao papel que desempeñarán as infraestruturas de gas na transición enerxética.
Durante a xornada, os profesionais de ambas as compañías abordaron aspectos relacionados coa evolución do mercado enerxético, a innovación, a dixitalización das redes e a incorporación de novas tecnoloxías. Tamén compartiron experiencias sobre a xestión das operacións, a calidade do servizo e a preparación das infraestruturas para integrar progresivamente máis gases renovables.
Un dos momentos máis destacados foi a visita á estación depuradora de augas residuais (EDAR) de Bens, unha instalación pioneira na produción de gas verde. Alí, a delegación puido coñecer de primeira man como o biogás xerado durante o tratamento de augas residuais se transforma en biometano, un gas verde coas mesmas propiedades ca o gas natural.
Parte deste biometano ou gas verde xa se inxecta na rede de distribución, o que permite aproveitar as infraestruturas existentes para levar enerxía renovable e de proximidade a fogares e empresas. A planta ten capacidade para producir 5 GWh anuais de biometano, cantidade dabondo para abastecer aproximadamente 980 vivendas e evitar a emisión dunhas 910 toneladas de CO2 por ano.
A colaboración entre Nedgia e Floene contribúe a impulsar o intercambio de coñecemento e a acelerar o desenvolvemento de solucións para avanzar cara a un modelo enerxético máis sostible. Ademais, salienta o importante papel das redes de distribución para facilitar a chegada do gas verde aos consumidores e apoiar a descarbonización da economía.
