Nedgia participou nunha nova edición do Grid Ready Forum, organizada pola European Biogas Association e que tivo lugar en Bruxelas. Foi un encontro de referencia a ámbito europeo que reuniu reguladores, operadores de rede e representantes do sector enerxético para impulsar a integración do gas verde nas infraestruturas gasistas.
Neste contexto, Joan Plana representou Nedgia nestas xornadas para reforzar a presenza da compañía neste foro europeo, no que xa participara na edición anterior. Un espazo clave para compartir coñecemento, analizar retos técnicos e regulatorios, e contribuír ao desenvolvemento de solucións que faciliten a inxección de biometano nas redes de distribución.
Durante o encontro abordáronse cuestións fundamentais como a harmonización dos estándares de calidade do gas, o acceso á rede, a planificación de infraestruturas e a redución dos custos de conexión, así como o desenvolvemento de solucións innovadoras, como os gasodutos virtuais. Iniciativas orientadas a avanzar cara a un sistema enerxético europeo máis integrado e eficiente.
O foro reuniu máis de 60 expertos do ámbito europeo, que coincidiron na necesidade de acelerar a implementación do Gas Package e de avanzar cara a marcos regulatorios máis homoxéneos que faciliten a incorporación de gases renovables nas redes existentes. Entre as conclusións destacadas, subliñouse a importancia de eliminar barreiras técnicas e regulatorias, e de reforzar a coordinación entre países para aproveitar o potencial do biometano como vector enerxético clave.
A participación de Nedgia neste tipo de encontros reforza o seu compromiso co desenvolvemento do gas verde e coa colaboración activa nos espazos de diálogo europeo que están a marcar o futuro do sistema enerxético.
