Gas Distributors for Sustainability (GD4S), a asociación que representa ás principais empresas europeas de distribución de gas, anunciou o nomeamento da súa nova presidencia durante a asemblea xeral realizada recentemente en Londres. Neste novo mandato, Gabriel Sousa, CEO de Floene, asume a presidencia da organización, mentres que Raúl Suárez, CEO de Nedgia, foi designado vicepresidente.
Este nomeamento reforza a presenza e o liderado de Nedgia no ámbito enerxético europeo e sitúa a compañía nunha posición destacada nos foros onde se definen as liñas estratéxicas do sector. Dende GD4S trabállase activamente para poñer en valor o papel das redes de distribución de gas como un elemento clave na transición enerxética e promóvense solucións que contribúan a un sistema enerxético máis sostible, seguro e eficiente.
En particular, a asociación impulsa a integración dos gases renovables, como o biometano, nas infraestruturas existentes, así como un uso máis eficiente e optimizado das redes de distribución. Estas iniciativas permiten avanzar cara á descarbonización, aproveitando redes xa despregadas, e achegar valor tanto aos consumidores como ao conxunto do sistema enerxético.
A nova presidencia de GD4S inicia o seu mandato nun momento especialmente relevante para o sector enerxético europeo, marcado polos desafíos asociados á redución de emisións, á seguridade da subministración e á competitividade enerxética. Neste contexto, resulta fundamental contar cunha visión coordinada entre os distintos vectores enerxéticos.
Como sinalou Raúl Suárez, vicepresidente de GD4S e CEO de Nedgia, a transición enerxética en Europa require solucións pragmáticas e unha maior coordinación entre as redes de gas e de electricidade para aproveitar cadansúas fortalezas co fin de ofrecer respostas eficaces aos retos actuais. Así mesmo, salientou a importancia de avanzar cara a unha visión global e integrada do sistema enerxético, na que as redes de distribución desempeñan un papel esencial.
Dende GD4S tamén se recoñeceu o labor realizado polo anterior equipo directivo, liderado por Laurence Poirier-Dietz e Jeroen Sanders, cuxo traballo contribuíu a reforzar o papel das redes de distribución de gas en Europa e a aumentar a sensibilización sobre a súa achega ao proceso de transformación enerxética.
Con este nomeamento, Nedgia reafirma o seu compromiso co desenvolvemento do gas verde, a innovación e a colaboración a ámbito europeo para avanzar xunto a outros actores do sector cara a un modelo enerxético máis sostible, competitivo e aliñado coas necesidades de clientes e territorios.
